കോപ അമേരിക്ക ടൂര്‍ണമെന്റ് -2024 ആരംഭിക്കാനിരിക്കേ അപ്രതീക്ഷിത വിരമിക്കല്‍ പ്രഖ്യാപിച്ചു ഉറുഗ്വേയുടെ പ്രഗത്ഭ താരം എഡിന്‍സണ്‍ കവാനി. അമേരിക്കയില്‍ ജൂണ്‍ 20ന് ആരംഭിക്കുന്ന കോപയില്‍ രാജ്യത്തെ പ്രതിനിധീകരിക്കാന്‍ കവാനി ഉണ്ടാകില്ല. 136 മത്സരങ്ങളില്‍ ഉറുഗ്വേക്കായി കളത്തിലിറങ്ങിയ കവാനി 58 ഗോള്‍ നേടി.
2011ല്‍ കോപ അമേരിക്ക ചാമ്പ്യന്മാരായ ഉറുഗ്വേ ടീമില്‍ അംഗമായിരുന്നു കവാനി. എന്നാല്‍, 2022ല്‍ ലോകകപ്പില്‍ ഗ്രൂപ്പ് ഘട്ടത്തില്‍ തന്നെ പുറത്തായ ശേഷം കവാനി ദേശീയ ടീമിനായി ബൂട്ടണിഞ്ഞിട്ടില്ല. സുദീര്‍ഘമായൊന്നും എഴുതുന്നില്ല. വാക്കുകള്‍ ചുരുക്കമാണെങ്കിലും അത് ഏറെ ആഴത്തിലുള്ളതാണ്.
കൊഴിഞ്ഞുവീണ വര്‍ഷങ്ങളില്‍ എന്റെ യാത്രക്ക് പിന്തുണയേകിയ ഓരോ വ്യക്തിക്കും എന്റെ നന്ദി. ഈ ലോകത്ത് ഞാന്‍ ഏറ്റവും കൂടുതല്‍ സ്‌നേഹിക്കുന്ന സ്വരാജ്യത്തിന്റെ ജഴ്‌സിയണിയുന്നത് എന്നെ സംബന്ധിച്ച് എല്ലായിപ്പോഴും അഭിമാനകരമായിരുന്നു എന്നാണ് കവാനി സാമൂഹിക മാധ്യമത്തില്‍ കുറിച്ചത്.
